اسلام آباد: وفاقی وزیر برائے مواصلات مراد سعید کا کہنا ہے کہ کراچی کچرا کنڈی بن چکا ہے اس کا ازالہ کرنا ہوگا، کراچی کے مسائل کے حل کی بات کریں تو کہتے ہیں وفاق نہیں بچے گا۔

تفصیلات کے مطابق وفاقی وزیر برائے مواصلات مراد سعید نے قومی اسمبلی کے اجلاس میں اظہار خیال کرتے ہوئے کہا کہ کراچی میں کچرا موجود تھا لوگوں کو اس سے تکلیف تھی، کیا ایم این ایز نہیں چاہتے کہ کراچی کا مسئلہ حل ہو۔

مراد سعید کا کہنا تھا کہ کراچی میں حالیہ بارش سے کئی لوگ کرنٹ لگنے سے جاں بحق ہوئے، بلاول بھٹو کا بیان آیا زیادہ بارش ہوتی ہے تو زیادہ پانی آتا ہے۔ بلاول بھٹو کا بیان سمجھ سے بالاتر ہے۔

انہوں نے کہا کہ کراچی کچرا کنڈی بن چکا ہے اس کا ازالہ کرنا ہوگا، نیب نے مراد علی شاہ کو بلایا تو وہ اسمبلی میں بلاول کا بیان دہراتے ہیں۔ وفاق نے ایک بات کی ہے سب مل کر کراچی کو مسائل سے نکالیں گے۔ کراچی کے مسائل کے حل کی بات کریں تو کہتے ہیں وفاق نہیں بچے گا۔

مراد سعید نے کہا کہ وفاق بچے گا مگر ان کی سیاست نہیں بچے گی، سندھ کے علاقے سب سے زیادہ غربت کا شکار ہیں۔ سندھ کی ترقی کا پیسہ اور تھر کا پیسہ ان لوگوں نے جعلی اکاؤنٹس میں ڈال دیا۔

انہوں نے مزید کہا کہ ایوان کا پیغام ہے کہ پاکستان قیامت تک قائم رہنے کے لیے بنا ہے، یہ لوگ بیٹھ کر سندھ کی تقسیم کی باتیں کرتے ہیں، آپ تقسیم ہوجائیں گے اور آپ کی سیاست ختم ہوجائے گی۔