کراچی: صوبہ سندھ کے دارالحکومت کراچی میں خوش رنگ و خوشنما پھولوں کی 66 ویں سالانہ نمائش کا آغاز ہوگیا۔ رنگ برنگ پھولوں کو دیکھنے کے لیے شہریوں کی بڑی تعداد نے سی ویو کا رخ کیا۔ موسم بہار کی آمد کے ساتھ ہی سی ویو پر 66 ویں سالانہ پھولوں کی نمائش سج گئی۔ خوشنما پھولوں کو دیکھنے کے لیے شہریوں کی بڑی تعداد نے یہاں کا رخ کیا۔ نمائش میں آنے والے افراد میں خواتین اور بچوں کی بڑی تعداد بھی شامل تھی جو تازہ پھولوں کی خوشبو سے لطف اٹھاتے ہوئے تصاویر بنوا رہے تھے۔ کچھ لوگ انہیں خریدتے بھی دکھائی دیے۔ اس موقع پر بچوں کے لیے خصوصی جھولے بھی لگائے گئے تھے۔ ہر سال منعقد کی جانے والی اس نمائش کا انتظام ہارٹی کلچر سوسائٹی کی جانب سے کیا جاتا ہے۔ نمائش میں 400 سے زائد اقسام کے پھول اور پودے رکھے گئے ہیں۔ نہ صرف کراچی بلکہ ملک بھر سے پھولوں کے شوقین افراد نے نمائش کا رخ کیا۔ نمائش میں پھولوں، پودوں اور باغبانی کے ساتھ گھر کی سجاوٹ کی دیگر اشیا بھی لوگوں کی توجہ کا مرکز بنی رہیں۔ شہریوں نے نمائش کے انعقاد پر منتظمین کا شکریہ ادا کرتے ہوئے کہا کہ اس طرح کی نمائش سے شہر کا مثبت تاثر سامنے آیا۔ ایسی سرگرمیاں شہر کی رونقیں بحال کرنے میں معاون و مدد گار ثابت ہوسکتی ہیں۔ پھولوں کی یہ نمائش اتوار تک جاری رہے گی۔ اس خبر کو لائیک یا شیئر کرنے اور مزید خبروں تک فوری رسائی کے لیے ہمارا اور وزٹ کریں