جعلی ڈومیسائل معاملے پر سندھ حکومت عدالتوں سے بھاگ رہی ہے، خواجہ اظہار

1 تعبيرية پیر 1 جون‬‮ 0202 - (دوپہر 1 بجکر 1 منٹ)

شیئر کریں:

جعلی ڈومیسائل معاملے پر سندھ حکومت عدالتوں سے بھاگ رہی ہے، خواجہ اظہار کراچی: ایم کیو ایم پاکستان کے رہنما خواجہ اظہار الحسن نے کہا ہے کہ جعلی ڈومیسائل معاملے پر سندھ حکومت عدالتوں سے بھاگ رہی ہے، انصاف کے حوالے سے ہمیں عدالتوں پر یقین ہے۔

اے آر وائی نیوز کی رپورٹ کے مطابق ایم کیو ایم رہنما خواجہ اظہار الحسن نے نیوز کانفرنس کرتے ہوئے کہا کہ جعلی ڈومیسائل بنانے والے افسران کے خلاف کارروائی کی جائے، کیا جعلی ڈومیسائل پشاور سے بن کر آرہے ہیں، ہم نے انصاف کے لیے عدالت کا دروازہ کھٹکھٹایا ہے۔

انہوں نے کہا کہ ایم کیو ایم کا موقف ہے 1973 کے آئین پر عمل کیا جائے، جو قانون ذوالفقار علی بھٹو نے بنایا اس پر عمل کیا جائے، قانون کے مطابق نوکریاں نہ ملنا وزیراعلیٰ سندھ، بیوروکریسی کے لیے باعث شرم ہے۔

خواجہ اظہار الحسن نے کہا کہ ایک تا 15 گریڈ کی نوکریاں مقامی لوگوں کا حق ہے مگر یہ نہیں دیا جارہا، سندھ کے عوام کو سندھ کے نام پر بیوقوف بنانا بند کیا جائے۔

ایم کیو ایم رہنما نے کہا کہ عوام کو سندھ کے حکمرانوں کی پالیسیوں سے خطرہ ہے، سندھ حکومت نے جعلی ڈومیسائل پر کمیٹی بنانے کا نوٹیفکیشن جاری کیا، سندھ حکومت کا نوٹیفکیشن عدالتی کارروائی پر اثر انداز ہونے کی سازش ہے۔

انہوں نے کہا کہ سندھ پبلک سروس کمیشن شہری دشمن ادارہ ہے، سابق آئی جی سندھ بھرتی کھول کر گئے اس پر عملدرآمد کیوں روک دیا گیا، ہماری بھرتیاں روک کر دیہی علاقوں سے لا کر لوگوں کو بھرتی کیا جارہا ہے، ہم سندھ حکومت کی بنائی گئی کمیٹی کو مسترد کرتے ہیں۔

خواجہ اظہار الحسن نے کہا کہ نیب سے مطالبہ کرتے ہیں کہ جعلی ڈومیسائل پر تحقیقات کرے، جعلی ڈومیسائل بنانے والے افسران کے خلاف کارروائی کی جائے۔