کویت سٹی، صنعا(مانیٹرنگ ڈیسک)یمن کے بحران پر ایک ہفتے سے جاری ’کویت مذاکرات‘کسی نتیجے تک پہنچے بغیر ہی ختم ہوگئے ۔ دوسری جانب یمن کے لیے اقوام متحدہ کے امن مندوب اسماعیل بن الشیخ احمد نے حوثی باغیوں کو آج سوموار کی صبح تک مذاکراتی شیڈول پر دستخط کرنے کی آخری مہلت دے رکھی تھی۔ العربیہ کے مطابق یمنی حکومت اور باغیوں کے درمیان صبح کے وقت ہونے والا اجلاس کسی پیش رفت کے بغیر اختتام پذیر ہوگیا۔ فریقین اختلافی مسائل کے حل کے حوالے سے کسی فریم ورک تک پہنچنے سے قبل ہی اجلاس سے اٹھ کر چلے گئے۔
ذرائع کا کہنا ہے کہ کویت کی میزبانی میں ہونے والی بات چیت میں حوثی باغی اپنے موقف پر ہٹ دھرمی سے قائم ہیں۔ اہم نوعیت کے مسائل کے حل کے بجائے وہ غیرضروری اور ثانوی درجے کے تنازعات میں الجھ گئے ہیں۔ یہی وجہ ہے کہ مذاکرات کا ایجنڈا آگے نہیں بڑھایا جاسکا ہے۔گذشتہ روز صبح کے وقت ہونے والے اجلاس میں ملک میں حوثی ملیشیا اور سابق صدر علی عبداللہ صالح کی وفادار ملیشیا کے ہاتھوں جنگ بندی کی خلاف ورزیوں کے بارے میں ایک رپورٹ بھی پیش کی گئی۔باغیوں کے راکٹ حملوں اور فائرنگ کے نتیجے میں کم سے کم 8 شہری مارے گئے۔
