یمن میں قبائلی عمائدین کی وساطت کاری کے نتیجے میں یمن اور سعودی عرب کی مشترکہ سرحد پر خاموشی دیکھنے میں آ رہی ہے۔ اس اقدام کا مقصد فوجی آپریشن کے علاقوں کے نزدیک واقع یمنی دیہاتوں اور قصبوں میں طبی اور امدادی سامان کے داخلے کو ممکن بنانا تھا۔ اتحادی افواج نے "علب" کی سرحدی گزرگاہ کے ذریعے سامان کی منتقلی کی اجازت دے دی۔ دوسری جانب ایک ہفتے کے وقفے کے بعد اتحادی طیاروں نے ایک مرتبہ پھر دارالحکومت صنعاء میں ملیشیاؤں کے ٹھکانوں کو حملوں کا نشانہ بنایا ہے۔ صنعاء کا جنوبی حصہ زوردار دھماکوں سے گونج اٹھا، جہاں عینی شاہدین کے مطابق اتحادی طیاروں نے الحفا عسکری کیمپ، جبل النہدین اور صدارتی دفتر پر بمباری کی۔ ادھر تعز میں سرکاری فوج اور عوامی مزاحمت کاروں نے صوبے کے مغربی حصے میں متعدد ٹھکانوں کا کنٹرول حاصل کر لیا جن میں تبة الخوعة، شارع غزہ اور الدحی کراسنگ شامل ہیں۔ یہ پیش رفت عوامی مزاحمت کاروں اور سرکاری فوج کی جانب سے البعرارہ، الحصب، الدحی اور حبیل سلمان کے علاقوں میں باغیوں کے ٹھکانوں پر تمام اطراف سے ایک وسیع حملے کے بعد دیکھنے میں آئی ہے۔